Dóra Pálsdóttir – Minning

Skrifað um September 30, 2016 · in Almennt

dora-palsd

Dóra Pálsdóttir (1947-2016) lést hinn 17. september s.l. og var jarðsungin í dag frá Neskirkju.

Elskuleg vinkona okkar til margra ára, Dóra Pálsdóttir, lést óvænt 17. september s.l. Við vissum það öll, að hún var veik, en ekki hvarflaði að okkur, að dauðinn væri það skammt undan. Fyrir aðeins réttum mánuði sat hún með okkur hér í stofu og lék á als oddi.

Dóra var gædd glaðlyndi og góðvild, svo að öllum leið vel í návist hennar, því að viðmót hennar var alúðlegt og henni eiginlegt. Hjartahlýrri manneskja er vandfundin. Hún var ávallt reiðubúin að hlaupa til og rétta öðrum hjálparhönd. Nú um hríð höfum við hjón einmitt verið ríkulega aðnjótandi þessara eiginleika Dóru, og fyrir það viljum við þakka sérstaklega.

Við höfum notið samvista við Dóru um mörg ár og samfundir okkar urðu tíðari með árunum. Dóra og Jens sóttu okkur nokkrum sinnum heim á Víkingavatn og oftsinnis höfum við dvalið hjá þeim í sumarhúsi þeirra, Hraunkoti, í Landsveit. Á báðum stöðum var efnt til gönguferða um fjöll og dali, hverju sem viðraði, og löngum stundum varið til samvista öll undanfarin sumur. Óhætt er að segja, að hvergi ná menn að kynnast betur en úti í ríki náttúrunnar og við sameiginlega glaðværð að kvöldi. Það var ekki síst fyrir höfðingsskap og gæflyndi þeirra hjóna, Dóru og Jens, að þessar ferðir tókust allar með ágætum.

Sérstakan sess í huga okkar skipar þó árviss veislufagnaður á heimili þeirra, þar sem aðalrétturinn var »rakefisk«, norskur fiskréttur, þar sem saltaður aborri eða síld er látin gerjast og meltast í eigin safa við lágan hita og loftfirrðar aðstæður í nokkra mánuði. Fiskur var snæddur kaldur og ýmislegt annað góðmeti var fram borið. Þetta eru okkur minnisstæð gestaboð ásamt öðrum góðum vinum.

Okkur þykir sem »skjótt hefir sól brugðið sumri« nú, þegar ljúf vinkona er horfin yfir þangað, sem enginn á afturkvæmt. Við þökkum margar ánægjulegar samverustundir og sendum eiginmanni hennar, Jens Tollefsen, sonum og fjölskyldum þeirra innilegar samúðarkveðjur.
30. september 2016

Sólveig Aðalbjörg Sveinsdóttir

Ágúst H. Bjarnason

 

Leitarorð:


Leave a Reply

:: Ágúst H. Bjarnason