Heilsa á fullu tungli

Skrifað um February 24, 2013 · in Almennt

Fullur máni. Ljósm. ÁHB.

Fullur máni. Ljósm. ÁHB.

Óneitanlega erum við haldin ýmsum bábiljum og hjátrú. Ýmsir kunna að segja, að það geri ekkert til, því að það gefi lífinu bara aukið gildi. Því hafa margir til að mynda trúað um langan aldur, að tunglið hafi mikil áhrif á líf okkar og störf. Um þetta hafa verið skrifaðar margar bækur til þess að ráðleggja fólki, hvernig það eigi að haga lífi sínu miðað við stöðu tunglsins. (Sjá til dæmis: Moon time, the art of harmony with nature and lunar cycl.) Hinir einu, sem hafa grætt á þessu eru höfundar bókanna.

Nú þykir fullvíst, að tunglið hafi engin áhrif á líðan manna, að því er sænskur fræðimaður, Torbjörn Åkerstedt, heldur fram. Hann hefur í áraraðir rannsakað svefn manna og líðan með tilliti til ýmissa aðstæðna.

Um miðja síðustu öld var því haldið fram á vísindalegum grunni, að fullt tungl hefði mikil áhrif á líkamsstarfsemina. Það var meðal annars fullyrt, að fleiri þyrftu þá á sjúkrahúsvist að halda og margt færi úrskeiðis á fullu tungli. Þetta mun stafa af svo kallaðri valbundinni skynjun, það er að segja, þegar er fullt tungl byrja menn að leita eftir ákveðnum hlutum og skýra þá samkvæmt því.

Til jafnaðar er fullt tungl einu sinni í hverjum almanaksmánuði. Ljósm. ÁHB.

Til jafnaðar er fullt tungl einu sinni í hverjum almanaksmánuði. Ljósm. ÁHB.


Hér er því um gamla þjóðtrú að ræða, sem rekja má til gamla bændasamfélagsins, þegar menn þurftu að nýta sér tunglskinið til að sinna nauðsynlegum verkum. Ef menn voru þjakaðir af svefnleysi á þeim tíma, var hægur vandi að kenna mánanum um.

Nú hefur þetta verið afsannað í eitt skipti fyrir öll. Það er því engin ástæða til þess að kvíða morgundeginum.

ÁHB / 24.2. 2013

Leitarorð:


Leave a Reply

:: Ágúst H. Bjarnason