Jarpkollupollafjall

Skrifað um August 14, 2015 · in Almennt · 2 Comments

Í sveitarfélagi nokkru var fenginn maður til þess að teikna hringsjá á stað, þar sem útsjón er mikil. Sést vítt um allar koppagrundir, suður til Herðubreiðar, langt í austur og enn lengra í norður, og mörgum örnefnum var raðað niður á skífuna.

Undir lok vinnunnar varð mönnum ljóst, að mikil eyða var í vesturátt, en þar fer mest fyrir lágum fjallgarði. Brugðu menn þá á það ráð að leita til bónda nokkurs á næsta bæ við sjónarhólinn og spyrja, hvort hann gæti ekki komið með nokkur örnefni til að fylla eyður á hringsjánni.

Bóndi brást vel við þessari málaleitan og sagði, að þarna skammt í vesturátt væri lítið fjall, sem hann kallaði Jarpkollupollafjall.

Enginn viðstaddra kannaðist við þetta nafn né gat skýrt merkingu þess, en nafnið féll vel inn í eyðuna á skífunni og var því greypt í hana.

14. ágúst 2015

ÁHB

Leitarorð:

2 Responses to “Jarpkollupollafjall”
  1. Davíð Hjálmar Haraldsson says:

    Við gil sem er kennt við kið
    að kvonbænum sá ég Hall.
    „Já“ sagði Jóna við
    Jarpkollupollafjall.
    DHH

    • Águst says:

      Þökk fyrir þetta.

      Ekki má ítum lá
      þótt öfundi drenginn Hall,
      því Jóna hún jafnast á
      við Jarpkollupollafjall.

      Kveðja
      ÁHB

Leave a Reply