Jurtafeiti sýnu verri en mettuð fita

Skrifað um April 17, 2016 · in Almennt

Það hefur verið almenn skoðun, að jurtafeiti, einkum sú, sem er rík af línólsýru, verndi menn gegn hjarta- og æðasjúkdómum, einkum vegna þess, að kólesteról í blóði lækki umtalsvert.

Samkvæmt nýjustu athugunum minnkar ekki hætta á hjartaáfalli við það að innbyrða fjölómettuð fituefni. Hins vegar kom í ljós, að fyrir hver 30 mg/dL sem kólesteról lækkaði í blóðvökva, jókst hætta á hjartaáfalli um 22%. (1 mg/dL = 0,01 g/l)

Á árunum 1968 til 1973 fór fram viðamikil könnun undir heitinu „Minnesota coronary experiment” á um 10’000 körlum og konum á sex geðspítölum. Fólkinu var skipt í tvo hluta og fékk annar hópurinn fæði ríkt af jurtafeiti og hinn hópurinn fæði með miklu af mettaðri fitu.

Niðurstaða þessarar athugunar var, að styrkur kólesteróls lækkaði í hópnum, sem fékk jurtafeiti. Samkvæmt fræðunum átti það að leiða til færri hjartaáfalla. En nú hefur þessi niðurstaða verið endurmetin og þá kom í ljós, að sú var alls ekki raunin.

Önnur umfangsmikil könnun, „Sydney diet heart study”, bendir einnig til hins sama. Þeim, sem fengu fjölómettaða jurtafitu, var hættara við kransæðasjúkdómum en hinum, sem nærðust á mettaðri dýrafitu.

Nú halda menn því fram, að ófullnægjandi úrvinnsla á gögnum frá fyrri tíð, hafi valdið þeim leiða misskilningi, að jurtafeiti sé hollari mönnum en dýrafita.

Nánar um þetta má lesa í tímaritinu British Medical Journal, frá 12. apríl síðast liðnum:

http://www.bmj.com/content/353/bmj.i1246

 

Re-evaluation of the traditional diet-heart hypothesisi: analysis of recovered data from Minnesota Coronary Experimetn (1968-73). British Medical Journal, birtist á vef 12. apríl 2016. Doi: 10.1136/bmj.i1246

 

ÁHB / 17. apríl 2016

 

Leitarorð:


Leave a Reply