Pseudoscleropodium – döggmosar

Skrifað um April 23, 2017 · in Mosar

Pseudoscleropodium purum. Myndin er tekin við Hvaleyrarvatn 23.4.2017. Ljósm. ÁHB.

Pseudoscleropodium purum. Myndin er tekin við Hvaleyrarvatn 23.4.2017. Ljósm. ÁHB.


Ættkvíslin Pseudoscleropodium (Limpr.) M Fleisch. (döggmosar) telst til Brachytheciaceae (lokkmosaættar) ásamt 10 öðrum kvíslum; þær eru:

Eurhynchium Schimp. (sporamosar)

Rhynchostegium Schimp. (snápmosar)

Cirriphyllum Grout (broddmosar)

Oxyrrhynchium (Schimp.) Warnst. (gaddmosar)

Kindbergia Ochyra (oddmosar)

Sciuro-hypnum Hampe (sveipmosar)

Brachythecium Schimp. (lokkmosar)

Eurhynchiastrum Ignatov & Huttunen (stingmosar)

Brachytheciastrum Ignatov & Huttunen (þyrilmosar)

Homalothecium Schimp. (prúðmosar)

Aðeins ein tegund er í þessari kvísl og er lýsing á henni látin nægja.

Pseudoscleropodium purum (Hedw.) M. Fleisch. – döggmosi

Plöntur grænar, ljósgrænar eða gulgrænar í lausum breiðum, jarðlægar eða uppsveigðar, allt að 15 cm á lengd. Þær eru oft nokkuð bústnar, fjaðurgreindar og stöngull er grænn. Blöð eru upprétt eða aðlæg, bein og mjög kúpt, 2-2,5 mm. Þau eru breiðegglaga til öfugegglaga, snubbótt eða bogadregin með stuttan, oft baksveigðan odd. Langfellingar eru greinilegar. Greinablöð svipuð en styttri, 1-2 mm. Rif einfalt og nær að blaðmiðju eða lítið eitt lengra. Engir rætlingar.
pseudosclerop_4
Frumur eru striklaga, 40-105 x 4-7 µm, hornfrumur eru ferhyrndar eða ferningslaga með þykka og holótta veggi.

Plöntur einkynja og hafa aldrei fundizt hér með gróhirzlur.

Vex í graslendi og birkikjarri. Sjaldgæf en vex á tveimur aðskildum svæðum hér á landi; annars vegar á Suðurlandi og hins vegar á Suðvesturlandi.

Sennilega er tegundin upprunnin í Evrópu en hefur dreifzt víða, meðal annars vegna þess að hún var notuð til þess að pakka inn viðkvæmum hlutum, sem voru sendir víða til annarra landa.

Helzt er hætta á að rugla tegundinni saman við Pleurozium schreberi (hrísmosa), en hann hefur rauðan eða rauðbrúnan stöngul, rif er styttra og tvöfalt og enginn oddur er á blaði.

Greinar eru snubbóttar. - Ljósm. ÁHB.

Greinar eru snubbóttar. – Ljósm. ÁHB.

 

 

 

P. purum er mjög stórvaxinn mosi. Ljósm. ÁHB.

P. purum er mjög stórvaxinn mosi. Ljósm. ÁHB.

 

 

 

 

 

 

 

 

 

 

 

ÁHB / 23. apríl 2017

 

Leitarorð:


Leave a Reply

:: Ágúst H. Bjarnason