Skaflinn í Esju ─ Rauðskrokksjökull

Skrifað um August 4, 2012 · in Almennt

Rauðskrokksjökull

Hallgrímur Sigursteinn Hallgrímsson, bókavörður, var víst um margt mjög sérstæður maður; oft kallaður „red body“.

Eitt sinn síðla sumars stóðu þeir við glugga í Safnahúsinu við Hverfisgötu Páll Eggert Ólason prófessor og Hallgrímur bókavörður.
Þá verður Hallgrími litið til Esjunnar og segir: „Nei, sérðu, Páll, það er enn snjór í Esjunni.“
„Já, veiztu það ekki, að þetta er jökull,“ sagði Páll Eggert.
„Nú, hvað heitir hann“ spyr þá Hallgrímur.
„Rauðskrokksjökull,“ svaraði Páll að bragði.

Gekk þá Hallgrímur í burtu.

Hallgrímur andaðist snögglega á Hótel Skjaldbreið í Vonarstræti 1945. Sagt var, að kjötbiti hefði setið fastur í hálsinum á honum. Að Hallgrími látnum var ort:

Floginn er til fegri landa,
friðnum hvílir í.
Hallaði sér og hætti að anda
Hallgrímur redboddý.

Höfundur: Elís Ó. Guðmundsson, skömmtunarstjóri.

Svo og þetta:

Líður sál um ljósan geim
laus við kvöl og dauða.
Nú hefur Bakkus borið heim
barn sitt Hallgrím rauða.

Höfundur: Friðfinnur Ólafsson, forstjóri.

 

 

Leitarorð:


Leave a Reply

:: Ágúst H. Bjarnason