Þorvaldur Ólafsson – Minning

Skrifað um September 19, 2016 · in Almennt · 2 Comments

 

Þorvaldur Ólafsson (1944-2016).

Þorvaldur Ólafsson (1944-2016).

 

Þorvaldur Ólafsson (1944-2016) andaðist 11. september s.l. Útför hans fer fram í dag frá Fossvogskapellu.

 

Það er sárt að þurfa að kveðja Þorvald Ólafsson, hreinskilinn heiðursmann, eftir löng og náin kynni. Haustið 1972 hófum við báðir kennslu í Menntaskólanum við Tjörnina (síðar við Sund) og stuttu síðar keyptum við hvor sína íbúð í sama húsi. Þar höfum við búið með fjölskyldum okkar þar til fyrir mánuði, að Þorvaldi var sá kostur nauðugur að flytja í hentugra húsnæði vegna heilsubrests.

Þorvaldur var menntaður í eðlisfræði og kenndi hana aðallega auk stjörnu- og stærðfræði fyrstu árin. Hann var einarður kennari, mjög vel að sér, vandaður og heill í öllu, sem laut að kennslu sem öðru. Skipulag og reglufesta var honum í blóð borin og hann hafði fastmótaðar skoðanir á kennslu, sem fóru kannski lítið eitt á skjön við það, sem kallast »nýmóðins kennsluhættir«. Það er ástæðulaust að draga fjöður yfir, að hann naut sín betur að kenna þeim, sem höfðu einlægan áhuga á eðlisfræði en öðrum. Hann rækti starf sitt af fádæma skyldurækni og lagði aldrei nema gott eitt til, þó að það hlyti ekki ætíð hljómgrunn. Í meginatriðum fóru skoðanir okkar saman og vorum við oft sagðir gamlir í hettunni.

Mörg verk unnum við saman við að fegra og bæta hús og garð við heimili okkar undir stjórn Brynju og Sólveigar. Þar kynntist eg drengskap Þorvalds og nákvæmni, þar sem allt var mælt upp á brot úr millimetra. Með honum var gott að vinna en dágóður tími fór í umræður um flest á milli himins og jarðar. Þorvaldur var duglegur við að lesa, bæði gamalt og nýtt, og miðlaði óspart úr fróðleiksbrunni sínum. Þá hafði hann næmt skopskyn og sagði vel frá.

Að eðlisfari var Þorvaldur lítillátur og hafði sig ekkert í frammi á opinberum vettvangi. Það var að mörgu leyti skaði, því að hann hafði vit umfram marga, sem hærra létu. Á hinn bóginn varð það hlutskipti hans að uppfræða og leggja grunn að menntun æskufólks. Fékk hann það ríkulega umbunað, þegar hann frétti af frama fyrrum nemenda sinna.

Eins og eðlisfræðingi sæmir forðaðist Þorvaldur að leita langt yfir skammt eftir skýringum á hlutum. Hann var raunsær maður. Eg get ekki látið hjá líða að greina frá litlu atviki, sem olli honum talsverðum heilabrotum.

Eitt vetrarkvöld vorum við að leggja flísar í anddyri. Þorvaldur fer þá að segja mér af smásögu, sem hann var nýbúinn að lesa um endurkomu Snorra Sturlusonar á leið upp í Reykholt í rútu og birtist í Tímariti MM. Stuttu seinna kemur dóttir hans fram á stigapallinn og kallar: »Pabbi, það er síminn til þín.« Þorvaldur svaraði: »Ég hef engan tíma, en hver er það?« – »Það er Snorri Sturluson,« sagði hún. »Þá verð eg að svara,« sagði Þorvaldur, hljóp upp og tók símann. – Þetta var þá nemandi með þessu nafni, sem var að leita ráða um skýrslugerð í eðlisfræði. Þótti okkur báðum þetta einkennileg tilviljun, að eini nemandi af nokkrum þúsundum, sem bar þetta nafn, skyldi hringja á þessari stundu.

Nú er skarð fyrir skildi við fráfall Þorvalds. Við fjölskyldan „á neðri hæðinni” söknum trausts vinar og hlýjar þakkir fara um hugann fyrir áratuga samfylgd. Við vottum Brynju, börnum þeirra og öðrum ættmennum samúð okkar.

 

  1. sept. 2016 / Ágúst H. Bjarnason

2 Responses to “Þorvaldur Ólafsson – Minning”
  1. Haukur Hjaltason says:

    Mér var brugðið þegar ég sá andlátsfregn Þorvalds. Hann kenndi mér í MS og var einhver besti kennari sem ég hef haft. Hann bar virðingu fyrir okkur nemendum og faginu sem hann kenndi, hann var með einhverjum hætti auðmjúkur og góður maður um leið og hann hafði skýra hugsun á því sameiginlega markmiði okkar nemanda og hans, nefnilega því að auka þekkingu okkar. Þorvaldur kenndi bæði mér og Ómari bróður mínum, og honum var hann ekki síðri kennari en mér. Bið þig Ágúst að færa fjölskyldu Þorvalds okkar bestu kveðjur með því besta þakklæti sem nemandur geta fært kennara sínum.

  2. Kristín Á. Ólafsdóttir says:

    Innilegar þakkir fyrir falleg og snjöll eftirmæli, Ágúst. Og fleiri ummæli um bróður minn í kjölfarið hlýja.

Leave a Reply

:: Ágúst H. Bjarnason