Þríhyrnuburkni – Phegopteris connectilis

Skrifað um March 28, 2013 · in Flóra

Myndin sýnir neðra borð á snubbóttum og heilrendum bleðli; gróblettir eru kringlóttir eða sporöskjulaga, engin gróhula. Teikn. ÁHB.

Myndin sýnir neðra borð á snubbóttum og heilrendum bleðli; gróblettir eru kringlóttir eða sporöskjulaga, engin gróhula. Teikn. ÁHB.


Þríhyrnuburknaætt – Thelypteridaceae
Um 900 tegundir teljast til ættarinnar og skiptast á 5 til 30 ættkvíslir. Flestar eru landplöntur en sumar vaxa á grjóti. Þær dreifast um heim allan en flestar tegundir ættarinnar lifa í hitabeltinu. Sameinkenni ættarinnar eru nállaga hár á blöðum.

Þríhyrnuburknar – Phegopteris (C. Presl) Fée
Aðeins þrjár tegundir tilheyra ættkvíslinni og vex aðeins ein hér á landi. Engin gróhula er yfir gróblettunum og því voru þríhyrnubruknar taldir til Polypodium í eina tíð.

 

Þríhyrnuburkni. Teikn. ÁHB.

Þríhyrnuburkni. Teikn. ÁHB.


 

Þríhyrnuburkni – Phegopteris connectilis (Michx.) Watt
Jarðstöngull skriðull, greinóttur og mjósleginn; þakinn hári og hreistursblöðum. Öll blöð eins. Stilkur jafnlangur til tvöfalt lengri en blaðka, stökkur, dökkgrænn við grunn en annars ljósari; bæði flosugur og hærður. Miðstrengur á efra borði í skoru ríflega upp fyrir miðja blöðku. Blaðka myndar greinilegt, nærri rétthyrnt, horn við stilk; nálægt því að vera þríhyrnd (eða breiðegglaga), tvífjaðurskipt, gengur fram í mjóan odd; jafnan lengri en hún er breið, grágræn og hvíthærð báðum megin. Neðstu blaðflipar hanga niður og fram á við, og er tegundin auðþekkt á því einkenni. Bleðlar snubbóttir og heilrendir, nema lítillega tenntir á neðstu blaðflipum. Gróblettir kringlóttir á neðra borði bleðla út við jaðar; engin gróhula.

15-40 cm á hæð. Vex í gjótum og á rökum stöðum í kjarri og víðar. Víða um vestanvert landið, sjaldgæfur í öðrum landshlutum.

Nefndur safnaðarburkni hjá Oddi Hjaltalín.

Samnefni: Dryopteris phegopteris (L.) C. Chr., Lastrea phegopteris (L.) Bory, Thelypteris phegopteris (L.) Sloss., Phegopteris polypodioides Fée

Nöfn á erlendum málum:
Enska: (Long) Beech Fern
Danska: Skov-Dunbregne, Dunet Egebregne
Sænska: Hultbräken
Norska: Hengeving
Finnska: Korpi-imarre
Þýzka: Buchenfarn
Franska: Polypode du hêtre, Phégoptéris à pinnules confluentes, Phégoptéris Vulgaire, Phégoptère à Segments Joint

ÁHB / 28. 3. 2013

 

 

Leitarorð:


Leave a Reply

:: Ágúst H. Bjarnason