Stórbændur hittast

Skrifað um December 14, 2012 · in Almennt

Vatnajökull.

Vatnajökull.

Mikill vinskapur var með föður mínum, Hákoni Bjarnasyni, og Oddi bónda Magnússyni, sem bjó ásamt konu sinni og þremur bræðrum í Bölta í Skaftafelli. Á haustmánuðum 1950 dvaldi Oddur í Reykjavík og bjó þá hjá okkur um tíma á Snorrabraut. Dag einn frétti faðir minn, að Jón bóndi Stefánsson í Möðrudal á Fjöllum væri kominn til bæjarins í einhverjum erindagerðum.

Svo var mér sagt, að þessir tveir bændahöfðingjar töldu, að lönd þeirra lægju saman á miðjum Vatnajökli. Fornar heimildir eru enda fyrir því, að bóndinn í Möðrudal átti skógarhögg í Skaftafelli en bóndinn í Skaftafelli sumarhaga fyrir hross í Möðrudal; þá áttu sendimenn rúm hvor í annars skála. Sennilega hafa leiðir þarna á milli lokast á 15. öld.

Þeir, Oddur og Jón, stóðu í einhverjum bréfaskrifum um þessi mál þrjátíu árum fyrr en höfðu aldrei hitzt. Það þótti því ærið tilefni til þess að bjóða Jóni heim, svo að þeir gætu kynnzt. Eg var þá stráklingur á fimmta aldursári og man því harla lítið eftir samfundum þeirra. Tvennt situr þó enn í minni mínu. Hið fyrra er, að þeir föðmuðust lengi og innilega í ganginum heima. Þótti mér það heldur skondin sjón. Hitt er mér minnisstæðara, að seinna þennan dag var ekið til að líta á einhvern gróðurteig fyrir utan bæinn. Þegar þangað kom, höfðu allnokkrar kindur komizt inn fyrir girðinguna og var því tekið til við að reka þær út. Vakti það furðu mína, hvað þessir gömlu menn, að mér fannst þá, hóuðu hátt og böðuðu út höndum við fjárreksturinn í sínum fínustu fötum. Karli föður mínum hefur án efa ekki þótt lakara að hafa þessa tvo þrælvönu sauðamenn sér til fulltingis við smalamennskuna.

Frá vinstri: Oddur Magnússon 56 ára, Hákon Bjarnason 43 ára og Jón Stefánsson 70 ára.

Frá vinstri: Oddur Magnússon 56 ára, Hákon Bjarnason 43 ára og Jón Stefánsson 70 ára.

Víst er, að aldrei hittust þeir nema í þetta eina sinn, því að Oddur Magnússon (f. 9. 3. 1894, d. 2. 3. 1951) lézt í febrúar næsta árs, þegar bíll hans lenti ofan í Bæjargili í Skaftafelli. Jón Stefánsson (f. 22. 2. 1880, d. 15. 8. 1971) varð á hinn bóginn háaldraður. Þegar við feðgar komum í Möðrudal 1964 rifjaði Jón upp þessa samverustund með Oddi og þakkaði föður mínum fyrir að hafa „tímt að eyða benzíni út fyrir bæinn“ á þá Odd.
Grein þessi birtist í Skildi fyrr á þessu ári.

ÁHB / 14.12.2912

Leitarorð:


Leave a Reply

:: Ágúst H. Bjarnason