„Fitusprenging“

Skrifað um February 28, 2015 · in Almennt

"Fitusprenging" er fólgin í því að splundra stórum fitudropum í örsmáa.

"Fitusprenging" er fólgin í því að splundra stórum fitudropum í örsmáa.

Margir þjást af magaverkjum og öðrum meltingar-óþægindum. Crohns-sjúkdómur og sáraristilbólga eru meðal þessara sjúkdóma. Oft hefur því verið haldið fram, að þessir sjúkdómar liggi í ættum, það er að genin ráði því, að sumum er hættara við sjúkdómunum en öðrum. Vissulega getur það verið raunin. En frá seinni hluta síðustu aldar hafa þessir kvillar aukizt svo gífurlega, að það er ekki unnt að skella skuldinni einvörðungu á ættartengsl. Samhliða þessari fjölgun tilfella hafa aðrir sjúkdómar fylgt í kjölfarið, sem valda offitu og hækkun á blóðsykri.

Í tímaritinu Nature birtist nýlega grein, sem hefur varpað nýju ljósi á þvílíka sjúkdóma, enda vakið verðskuldaða athygli. Höfundarnir eru Benoit Chassaing og Andrew Gewirtz við Georgia State University í Bandaríkjunum.

Í stuttu máli er niðurstaða þeirra sú, að efni, sem eru notuð til að fleyta fitu (emulgera), auki verulega hættu á bólgusjúkdómum í meltingarfærum. Þessu til skýringar má geta þess, að fita myndar jafnan stóra dropa í matvælum. Flestir kannast við, hvernig rjómi (fita) skilur sig frá undanrennu. Til þess að koma í veg fyrir þetta er fæðan „fitusprengd“ (emulgeruð, fleytuð) og þá verða fitudroparnir örsmáir og dreifast jafnt um efnið og haldast á sveimi til dæmis í mjólk, en setjast ekki til.

Unnt er að fleyta eða fitusprengja fitu á ótal vegu. Oft eru notuð ákveðin efni til þess og þau eru í næstum öllum löguðum mat og meðhöndluðum matvælum. Þetta er gert til þess að réttirnir fái rétt útlit.

Efnin hafa þau áhrif á bakteríur í meltingarvegi, að hætta á bólgusjúkdómum eykst. Það gerist vegna þess, að bakteríurnar komast í nánari snertingu við slímu (slímhúð) maga og þarma. Einnig verða breytingar á tegundum baktería og það kann að valda því, að blóðsykur hækkar.

Þetta mun vera í fyrsta skipti, sem sýnt hefur verið fram á skaðleg áhrif slíkra efna, þó að þau séu leyfileg. Einnig hefur því verið hreyft, að fitusprenging í matvælum, þar á meðal í mjólk, sé algjörlega óþörf og jafnvel skaðleg.

Á þessum síðum hefur áður verið fjallað um bakteríur í meltingarvegi, sjá meðal annars:

http://ahb.is/slegid-a-hungurtilfinningu/

http://ahb.is/laktosi-og-laktosaothol/

http://ahb.is/gerlar-sem-grenna/

http://ahb.is/enn-og-aftur-um-tharma-floru/

http://ahb.is/meira-um-tharma-floru/

http://ahb.is/tharmaskolun-detox-og-saurgjafir/

ÁHB /28. febrúar 2015

 

Leitarorð:


Leave a Reply

:: Ágúst H. Bjarnason